ШҰҒЫЛ! Kameralıq baqılaw jüyesiniñ tïimdiligi Толығырақ

Telearna twralı

1991 jıldıñ 30 säwirinde Qızılorda oblıstıq telearnası aşıldı. Däl osı küni 30 mïnwttıq xabar éfïrge şıqtı.

1 mamır küni qalanıñ ortalıq alañındağı merekelik şerwden 45 mïnwttıq tikeley reportaj körermenge usınıldı. Telearnanıñ aşılwına oblıstıq radïonı uzaq jıldar basqarğan, KSRO radïosınıñ qurmetti qızmetkeri  Jaqsılıq Bekqojaev pen  Bayan Ïslambaeva, Aytkül Şalğınbaeva, ïnjenerler Baqıtjan Şökenov, Marat Şalabaev, Jänibek Jumanov, Yurïy Efanovtar murındıq boldı. Telearnanıñ alğaşqı rejïsseri qızmetin Xuseyin Ämir-Temir atqarsa, tuñğış dïktorı Aygül Orazova edi;

Texnïkalıq qalıptasw kezeñiniñ qïındıqtarına qaramastan telearna jwrnalïsteri ülken izdeniste eñbek etti. «Jüzdesw», «Kökeykesti», «Temirqazıq» xabarları arqılı körermen közayımına aynaldı. Sır elin ulttıq önerdiñ qaynar közi retinde keñinen nasïxattadı.

1992 jılı alğaş ret oblıstıq  deñgeyde «Änşi balapan», «Tañşolpan» bayqawları ötkizildi. Büginde osı bayqawlardan tülep uşqan talanttar elimizge belgili éstrada juldızdarı: A. Kişkenbaev, M. Sädwaqasova, G. Orazımbetova jäne t.b;
 
1995 jılı «Sır sañılaqtarı» telejobası uyımdastırıldı. Sır öñirinen şıqqan öner tarlandarı, şığarmaşılıq ïeleri R. Bağlanova, Q. Sultanbaev, M. Erälïeva, Ş.Sarïev, Ïran-Ğayıp, K.Düysekeev t.b. qatısqan 2 sağattıq keştiñ tüpnusqası «Qazaqstan» Ulttıq telearnası men oblıstıq telearnanıñ altın qorında saqtawlı.

 
Telearnanıñ xabar taratw awqımı, materïaldıq bazası jıl sayın ulğayuda. Xabar taratw awqımı on jıldıñ köleminde 5 sağatqa,  2004 jıldan bastap 14 sağatqa köbeydi. 2007 jıldıñ 1 qañtarınan bastap telearna xabarları 1 sağat köleminde «Katelko» spwtnïktik jüyesi arqılı tartıla bastadı;
 
2009 jıldan bastap, «Qazaqstan-Qızılorda» telearnası respwblïkada alğaşqılardıñ biri bolıp oblıs awmağına täwligine 14 sağat köleminde xabar taratwğa köşti. 
 
2010 jılı telearna xabarları santañbalıq televïzïyalıq taralımnıñ ulttıq paketine engizildi.
 
2011 jıldıñ 30 säwirinde Täwelsizdikpen töl qurdas telearna 20 jıldıq mereytoyın atap ötti.
 
«Qazaqstan-Qızılorda» telearnası - qarjılıq-ékonomïkalıq turğıdan damığan, televïzïyanıñ soñğı ozıq texnïkalarımen jabdıqtalğan jäne jwrnalïstïkadağı jaña tendencïyalardı öndiriske batıl engizgen,  bäsekege qabiletti telearna qatarında.