ШҰҒЫЛ! 969 ПӘТЕР ПАЙДАЛАНУҒА БЕРІЛЕДІ Толығырақ

Халық пен билік арасындағы алтын көпір

14:41, 22 сәуір 2016

Қазақстан-Қызылорда телеарнасы 25 жыл бойына облыстың әлеуметтік–экономикалық, саяси-мәдени тыныс-тіршілігін бұқараға кеңінен насихаттап келеді. Аймақтың даму тынысына дем берген қажырлы қайраткер, білікті саясаткер, іскер азаматтарды дара тұлға ретінде елге танытуда жетекші арна журналистерінің еңбегі орасан. Телеарнаның ширек ғасырлық тарихына куә болған атқамінерлердің пікір-пайымы осындай. Сыр елінің арда азаматтарымен Елорда төрінде жүздескен тілшіміз Аягөз Қожақова тарқатып айтсын.

Тілші: Елорда – білікті кадрлар мен талай тұлғалардың бас қосқан орта. Арқа төсінде еңбек етіп жүргендердің бірі  – ҚР Парламенті Сенатының депутаты –Мұрат Бақтиярұлы. Түсіру тобымыздың Астанадағы сапары барысында халық қалаулысымен жүздесудің сәті түсті. Сенатор Сыр айнасының қалыптасу кезеңінің куәгері. Төл арнаның  ширек ғасырлық тарихы турасында әңгімені әріден бастады. 1991 жылы телеарнаның ашылуы - өңір үшін айтулы оқиға болды дейді ол.  

Мұрат Бақтиярұлы – аймақтың бас идеологы болған тұста жетекші арнамен әріптестік байланысы нығайып,бұл кезеңде Жақсылық Бекқожаев, Есенгелді Шілдебаев сынды сала майталмандарының ізін жалғаған кадрлардың сапалы қызметіне тәнті болғанын жасырмайды. «Бұқара мен биліктің бірден-бір дәнекері осы облыстық телеарна. Күні бүгінге дейін аймақтың көшбасшы телевизиясы ретінде көпке мойындалған» деген пікірде.

Мұрат Бахтиярұлы- ҚР Парламенті Сенатының депутаты

         /1991 жылы Қазақ гуманитарлық заң университетінде ұстаздық етіп жүрген кезімде, облыстық телеарна 30 сәуірде тұңғыш рет 30 минуттық хабармен эфирге шықты. Ертеңіне 1 мамыр мерекелік шеру болатын, ұмытпасам, сонда 45 минуттық арнайы репортаж берілді..Және облысқа, аудандарға жиі сапарлағанда байқағанамыз: ондағы жұртшылық аймақтың жаңалығын осы облыстық телеарна арқылы біліп отырады. Яғни, тұрақты көрермендері қалыптасқан. Демек, бұл «Қазақстан-Қызылорда» телеарнасының облыс үшін орны ерекше екенін білдіреді. «Қазақстан-Қызылорда» телеарнасының бүгінгі журналистері жан-жақты шыңдалған және олардың облыста болып жатқан саяси-әлеуметік, мәдени оқиғаларды дер кезінде эфирге беруінде жоғары кәсібилігі көрініп тұрады. /

Тілші: «Шаһар жаңалықтарын шартарапқа жеткізуде облыстық телеарнаның ролі үстем. Күн сайын өсіп-өркендеген облыс орталығының тыныс-тіршілігі бір сәтте ел назарынан сырт қалған емес. Елдің мұңын жоқтап, мұқтажын айтып, игі бастамалардың  мерейін арттырып, іскер азаматтардың мәртебесін көтеріп, жалпы өңірдің айтулы жақсылықтарын жұртшылыққа жеткізуде - бұл арна ұжымының еңбегі орасан»,- дейді Сырдың тағы бір перзенті  Мархабат Жайымбетов. Қазіргі таңда ол Ұлттық экономика министрлігіне қарасты комитетті абыроймен басқарып отыр.    

Мархабат Жайымбетов - ҚР Ұлттық экономика министрлігі Құрылыс, ТКШ істері және жер ресурстарын басқару комитетінің төрағасы

алыққа күнделікті ақпарат беру, елдің экономикалық ахуалын айтып отырудан «Қазақстан-Қызылорда» телеарнасын нөмірі бірінші ақпарат құралы деуге толық негіз бар. Ұжым басшысы Жағыппар Аманжолұлы Қарабала үлкен еңбек жасады. Бұл ұжымнан өте талантты, жақсы журналистер шықты. Мәселен, кезінде жарқ етіп шыққан Сағитжан Бермағанбетовті айтуға болады. Бүгін оның замандастары, «Хабар», «Қазақстан» сынды республикалық арналарда қызмет жасап жүр. Бағдат Бектұрғанқызы, Нұрбек Әмиша сияқты інілеріміз, қарындастарымыз өз еңбектерімен елге танылып келеді. Бұл Жағыппар Қарабала ағамыздың мектебінен өткен елге танымал шәкірттердің бірі ғана. Сондай-ақ, бұл ұжымның журналистері мағыналы, маңызы зор бағдарламаларымен республикалық байқауларда да топ жарып жүр. Болашақта да облыстық телеарнадан мықты кәсіби мамандар шығады деп сенемін. /

Тілші: Ал, Мұрат Әбенов облыстық телеарнаның ауқымды жобаларын жүзеге асыруға атсалысқан тұлғалардың бірі. Аймақтың идеологиясын тізгендеген шақта жетекші арнаның әрбір бастамасын қуана қолдағанын айтады. 

Мұрат Әбенов- «Өрлеу» АҚ директорлар кеңесінің төрағасы

/Барлық кезеңде, жеке өзіме облыстық теледидармен жұмыс істеу өте қызық болды. Себебі, түсіністік мол. Мемлекеттік мүдде, шығармашылық көзқарас ..жалпы қай кезде болмасын журналистер билік пен бұқара арасын байланыстырушы көпір бола жүріп, үлкен жауапкершілікті мойындарына алды. Осыдан 10 жыл бұрын «Қорқыт-ұлы дала сазы» атты фестиваль көрерменге жол тартты. Осы үлкен жобаны жүзеге асыруда біз облыстық телеарнамен қоян-қолтық жұмыс істедік.../

Тілші: Бүгінде тәулігіне 14.5 сағат хабар тарататын телеарнаны еліміздің түкпір-түкпірінде жүрген Сыр перзенттері үзбей көретіндерін айтып, толассыз тілектерін жаудыруда. Энтузиазм мен толассыз ізденіс, шеберлік пен сауатты басқаруы үйлескен – төл арна ұжымы  әлі талай шыңдарды бағындырады.  Елге белгілі тұлғалар  Сыр айнасының әлі сәтті бастамаларына куә боламыз деп сенеді.  

А. Қожақова, А.Әшірбеков

 

Тақырып бойынша материалдар

«Қазақстан-Қызылорда» телеарнасына – 25 жыл
14:40, 27 сәуір 2016
«Қазақстан-Қызылорда» телеарнасына – 25 жыл
Толығырақ...

Танымал жаңалықтар

СОТ САЛАСЫНА ЖАҢА ТЕХНОЛОГИЯЛАР ЕНГІЗІЛУДЕ
18:11, 20 қараша 2020
СОТ САЛАСЫНА ЖАҢА ТЕХНОЛОГИЯЛАР ЕНГІЗІЛУДЕ
Толығырақ...