ШҰҒЫЛ! АЛТЫН ҚОРДАҒЫ ХАБАРЛАР ҚАЙТА КӨРСЕТІЛЕДІ Толығырақ

Қайсарлық пен қаһармандыққа тағзым

17:07, 10 мамыр 2016

Ұлы Отан соғысына Қасиетті Қармақшы жерінен 5000-нан астам адам аттанған. Алайда соның 1294-і ғана елге қайта оралыпты. Олардың арасында Кеңес Одағының батыры Тәйімбет Көмекбаев та бар. Бүгінде ауданда Мәскеу мен Ленинградты, Балтық маңы мен Молдованы, Украина мен Беларусьті, Жапония мен Манчжурияны азат етіп, Берлинді алған ардагерлердің төртеуі ғана қалған. Жеңіс таңын атырып, азаттықты алып келген қазыналы қарттар қатары сиресе де, ерліктері мен есімдері мәңгілік ел есінде.

Ұлы мерекенің шуақты таңы Қармақшылықтар үшін қуанышпен басталды. Жеңістің жетпіс бірінші көктеміне орай аудан орталығынан «Ардагерлер үйі» ашылды. Салтанатты шарада сөз алған Сұлтан Ысқақұлы игі іске мұрындық болған жергілікті аудандық кәсіпкерлерге алғысын айтты.

Сұлтан Мақашов – Қармақшы ауданының әкімі

Тілші: Ғимараттың құрылысы іскер азаматтардың демеушілігімен жүргізілген. Құрылыстың жалпы құны сегіз жарым миллион теңгені құрайды. Аудандық ардагерлер кеңесі төрағасының сөзіне қарағанда, мұнда ардагерлер тек бас қосып қана қоймай, жастарға тәлім тәрбие де бере алады.

Қаршыға Есдәулетов – аудандық ардагерлер кеңесінің төрағасы

Тілші: Жаңа ғимарат барлық құрал-жабдықтармен жасақталған. Шахмат пен дойбы, тоғызқұмалақ ойнайтын, газет-журналдар оқитын орын, сонымен қоса әртүрлі жаттығулар жасауға арналған тренажер бөлмесі де бар.

Мақсұт Өтегенов – ардагер

Тілші: Мұнан әрі сұрапыл соғыстың сойқанын тыйып, бейбіт ғұмырдың бақытына бөленген Ұлы Жеңіс мерекесі Тағзым алаңында жалғасын тапты. Қанды қырғында қатыгез жауға қарсы шауып, ел ертеңі үшін жанын пида еткен, тылда тынымсыз тер төккен батыр бабалар ұрпағы сап түзеп, Мәңгілік алау мемориалды кешеніне бет алды. Елді жау езгісінен азат еткен ержүрек есіл ерлерді еске алып, мәңгілік алау ескерткішіне құшақ-құшақ гүл шоғы қойылды.

Сұлтан Мақашов – Қармақшы ауданының әкімі

Тілші: Алаңға жиналған қауым асқақ батыр бабалар рухына тағзым етіп, бір сәттік үнсіздік жариялады. Бірлігі бекем бейбіт елдің Ұлы мерекесін тамашалауға жиналған жұртшылық жігері жалын жауынгерлер ерлігін ойға алып, бір сәт сілтідей тынды.

Иса Бисенов – Вьетнам соғысының ардагері

Тілші: Мерекелік шара мұнан әрі орталық алаңдағы концертке ұласты. Қанды соғыс қаһары төнген мезетте ажал аранымен айқасуға аттанған сарбаздар, қаралы хабар, қара қағаз, сүйген жарына деген қимас сезім, сарғалдақ сағыныш, соғыс жылдары тылда еңбек еткен асыл аналар, қыз-келіншектер мен балғын балалар бейнесі сомдалды. Жеңіс жыры көкте қалқып, өр рух пен ұлы сарынға толы салтанатты әндер орындалды.

Адамзат баласын фашистік экспансиядан арашалауда тыл ардагерлерінің де еңбегі зор. Орталық алаңда бой көрсеткен Аршын Қуатбаева мен Әбдібек Жақпаев асыр салып ойнайтын балалық шақтарында елдің ертеңі үшін тылда еңбек еткен. Енді міне, қазыналы қарттар елмен бірге ұлық мерекені тойлауда.

 

Аршын Қуатбаева – тыл ардагері

Әбдібек Жақпаев – тыл ардагері

Тілші: Қан майданның қақ ортасында қайсарлық танытқан қаһармандар есімі жас ұрпақ жадында жаңғырып, асқақ үнді ақындар жырына қосылды. Өрелі өрендер мың бұрала билеп, халыққа мерекелік көңіл-күй сыйлады. Тұрғындар мерекенің жоғары деңгейде өткеніне дән-риза.

Денсаулығына байланысты Жеңіс күні тағзым алаңына келе алмаған қарт жауынгерлерге біз өзіміз барып, сәлем беріп, бүгінгі бейбіт күн үшін алғысымызды білдіруді парызымыз деп санадық. Ерлігі елге мұра, ұрпаққа ұран ардагерлердің ақ баталарын алдық.

Шәкіман Бектібайұлы – ҰОС ардагері

Қуанышбай Бисенбаев – ҰОС ардагері

Тілші: Сұрапыл соғыста, кескілескен ұрыста от пен оқтың ортасында жүріп қаншама азамат жат елде жер жастанды. Атаның қанымен, ананың жасымен келген жеңісті дәріптеу, бабалар рухына тағзым ету ұрпаққа парыз. Жүз шайыр шыққан киелі мекен бұл парызын абыроймен атқарды.

Бекзат Есқалиев, Бекболат Әбде

Тақырып бойынша материалдар

Саяси қуғын-сүргін құрбандарын еске алды / Жас кәсіпкерлер үшін жаңа мүмкіндіктер
15:49, 4 маусым 2016
Саяси қуғын-сүргін құрбандарын еске алды / Жас кәсіпкерлер ү...
Толығырақ...

Танымал жаңалықтар

ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
16:33, 16 сәуір 2021
ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
Толығырақ...
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
16:31, 16 сәуір 2021
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
Толығырақ...