ШҰҒЫЛ! АЛТЫН ҚОРДАҒЫ ХАБАРЛАР ҚАЙТА КӨРСЕТІЛЕДІ Толығырақ

Шиеліде Ұлы Жеңіс ұлықталды

16:46, 10 мамыр 2016

Ашық аспан, бейбіт өмір. Бүгінгі ұрпақ қазіргі тәуелсіз Қазақстан елінде мұңсыз өмір кешуде. Мұндай еркіндік бақытын адамзат тарихындағы ең жойқын күресте бесіктен белі шықпай еңбекке араласып, бұғанасы бекімей қолына қару алып, қасық қаны қалғанша күрескен аға ұрпақ сыйлады. Сонау Жер-ананы өрт шарпыған соғыс жылдарында елі мен жерін, ұрпағының болашағын қорғаған, Отанға бейбіт өмірді тарту еткен, қан майданда от кешкен ержүрек жауынгерлер - бүгінгі ақ сақалды ардагерлер мен ақ жаулықты аналар әрқашан жоғары құрметке лайық екені даусыз.

Сондықтан да, оларға деген ыстық ықылас пен құрмет, алғыс ешқашан толастамайды, керісінше «тау алыстаған сайын биіктей түседі» демекші, уақыт өткен сайын еселене бермек.

         Шиелі ауданына қарасты Бала би ауылының тұрғыны, Ұлы Отан соғысының ардагері Айдар Жолбаев бізбенен сұрапыл соғыс жылдары туралы естеліктерімен бөлісті. Қарт майдангер жаяу әскер полкінің құрамында Белоруссияның астанасы Минск, Украинадағы Курск қалаларын азат етуге қатысқан. Екі мәрте ауыр жарақат алса да, қасық қаны қалғанша жаумен айқасты. Ерекше ерлігімен көзге түскен ол «Қызыл жұлдыз» ордені мен Ұлы Отан соғысының І-ші және ІІ-ші дәрежелі төсбелгілерімен марапатталған.

Айдар Жолбаев – ҰОС ардагері

Тілші: Айдар Жолбайұлы майданға небәрі 20 жасында аттанды. Бір ай бойы тыңғылықты дайындалып, жаяу әскер сапында 1941-ші жылы Минск қаласын қорғады. Бірақ сол шайқаста аяғына оқ тиіп, жараланады. Дегенмен бойындағы ерік-жігерінің арқасында отанын қорғау үшін қан майданға қайта аттанады. 1943 жылы Курск түбіндегі ұрыстарға қатысып, онда да Кеңес әскері жеңіске жетеді. Бірақ бұл сұрапыл шайқаста жас жауынгердің толығымен сол жағы қатты жараланады. Сөйтіп, 1944 жылы елге оралады.

Айдар Жолбаев – ҰОС ардагері

Тілші: Ардагер қан майданнан оралғаннан кейін, ұзақ жылдар қажымай, талмай ұстаздық етті. Алдымен Қызылорда қаласындағы мұғалімдер дайындайтын техникумын үздік бітіріп, Ащықұдық жеті жылдық мектебінде мұғалім болып қызмет етеді. Одан соң Шымкенттегі педагогикалық институттың тарих факультетінде сырттай оқуын тәмамдап шығады. Ары қарай мектепте үздіксіз жұмыс атқарып, 1980 жылы құрметті еңбек демалысына шығады. Ұзақ уақыт өмірін жас ұрпақты ғылымға, білімге тәрбиелеген Айдар атамыздың еңбек жолы кімге де болса үлгі, өнеге. Қазақстан Республикасының Білім және ғылым министрлігінің, облыстық білім басқармасының грамоталарымен марапатталған.

Бүгінде Айдар ата 4 ұл мен 4 қыздан таралған немере-шөберелерінің ортасында шалқыған қазыналы қария.

Айдар Жолбаев – ҰОС ардагері

Бүгін – 9 мамыр. Ұлы Жеңіске – 71 жыл! Бүгін халқымыздың батыр ұл-қыздарының ерлігін паш етіп, қайсарлықтарын насихаттар күн! Осыған орай өңіріміздің түкпір-түкпірінде Ұлы Жеңіс күні салтанатты түрде аталып өтуде. Шиелі жұртшылығы да айтулы күнді тағзым алаңында қарсы алды. Ұрпағына бейбіт өмір сыйлаған майдангерлердің рухына тағзым етуге жиналған көпшілік ата-баба ерлігін бір минут үнсіздікпен еске алудан бастады.

         Айта кетейік, Шиелі топырағынан қан майданға 6000-нан астам адам аттанған. Сұм соғыстан аман оралған 2000 жауынгерден бүгінде көзі тірі 4 ардагер ғана қалыпты.
Тілші: «Ерлікке мың тағзым». Соғыс және тыл ардагерлерінің ерен еңбегін ұлықтауға арналған шара осылай аталды. Минуттік үнсіздіктен кейін аудан әкімі бастаған топ «Мәңгілік алау» мемориалына гүл шоқтарын қойды. Ауданның бас имамы майдангерлердің әруағына құран бағыштады. Одан кейін жиналған қауым әскери үлгіде киінген қорғаныс бөлімінің сарбаздары бастаған мерекелік шеруді тамашалады.

 «Тағзым» алаңында аудан әкімі сап түзеген шеруді қарсы алып, Ұлы Жеңістің 71 жылдығымен салтанатты түрде құттықтады. «Жеңіс күні – бұл сан мыңдаған ұрпақ үшін ортақ мереке. Бұл – Отанын қорғаған жауынгер-солдаттар мен офицерлердің айбыны, тылдағы Жеңісті жақындатқан жұмысшылар еңбектерінің мәңгі өшпейтіндігін дәлелдейтін белгі» - деп өз жүректолғанысын білдірді.

Қайратбек Сәрсенбаев – Шиелі ауданының әкімі

Тілші: Мұнан соң жергілікті Мәдениет үйінің қызметкерлері әзірлеген концерттік бағдарлама жалғасты. Патриоттық әндер шырқалып, рухы биік өлеңдер оқылды.

 Иә, майданға азаматын шығарып салып, ошағын өшірмей, отбасының бүтіндігін сақтаған аналарымыздың да сын сағаттағы еңбегі ерен. Ендеше, тылдағы жұмысты тынымсыз атқарған аналар мен жас балалардың еңбегі де ескерілмей, еленбей қалмауы тиіс. Зұлматты соғыста Қазақстан тылдық қажеттілік жақтан үлкен қолдау көрсетті. Бейбіт мақсаттарға жұмсалатын қаржы мейлінше қысқартылды. Осылайша көптеген кәсіпорындар қорғаныс өнімдерін шығара бастады. Соғыс жүріп жатқан жерлерден және майданға жақын аймақтардан барлық зауыт-фабрикаларды, кәсіпорындарды Қазақстанға көшіру жүргізілді. Сын шақтарда Қазақстан КСРО-ның негізгі әскери-өнеркәсіп базасына айналды. Бұл жылдары күрек ұстауға жараған баладан бастап, еңкейген қартқа дейін «Барлығы соғыс үшін, барлығы майдан үшін» ұранымен жұмыс істеді.

Осылайша тұрғындар ашқұрсақ жүрсе де Отан қорғап жатқан батырлардың азығы мен қаруын сайлаудың қамына кірісті. Солардың бірі – Шиелі ауданының тұрғыны, тыл арадагері Ысқақ Мақашов. «Соғыс бізді ерте есейтті» - деп бастады ол сөзін. Соғыс басталғанда ол небәрі 8 жаста еді. Майданға аттанғалы тұрған әкесі мен ағасына анасы мен қарындастарына қамқор болуға уәде беріп қалады. Белі қатаймай жатып қолына орағы мен кетпенінін алып, күндіз-түні егістікте талмай еңбек етті. Бәрі де Жеңіс үшін...

Ысқақ Мақашов – тыл ардагері

Тілші: Қорыта келе, бүгінгі ұрпақ аға буын-ардагерлер танытқан қаһармандық пен қайсарлықтан өнеге алып, бой түзеп келеді. Отансүйгіштіктің хас үлгісін көрсеткен майдангерлердің ерлігі ел жадында мәңгі сақталады.

М.Мұқашева, Н.Мұзарапшин

Тақырып бойынша материалдар

Саяси қуғын-сүргін құрбандарын еске алды / Жас кәсіпкерлер үшін жаңа мүмкіндіктер
15:49, 4 маусым 2016
Саяси қуғын-сүргін құрбандарын еске алды / Жас кәсіпкерлер ү...
Толығырақ...

Танымал жаңалықтар

ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
16:33, 16 сәуір 2021
ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
Толығырақ...
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
16:31, 16 сәуір 2021
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
Толығырақ...