ШҰҒЫЛ! АЛТЫН ҚОРДАҒЫ ХАБАРЛАР ҚАЙТА КӨРСЕТІЛЕДІ Толығырақ

Сырдарияда Жеңіс күні аталып өтті

17:09, 10 мамыр 2016

Биыл Берлин түбінде Жеңіс туының желбірегеніне 71-жыл. Бес жылға созылған сұрапыл соғыстың соңғы нүктесі дәл осы күні қойылды. Қаншама жас жер жастанып, қаншасы қыршынынан қиылды. Қиын жолмен келген азаттықтың да арайлы таңы атты. Жеңіс күніне орай Сырдария ауданында салтанатты шара өтті.

Тілші: Дүрбелең дәуірдің дүмпуі тарихта екіші дүние жүзілік соғыс деген атпен қалды. Буыны  бекімген бозбала бораған оқ пен жалынды оттың арасында жүріп Отанын қорғады

Жеңіс мейрамы қасиетті де қастерлі мереке . Бұл жанқияр ерлік пен еңселі елдіктің өтемі. Бүгінгі қой үстіне бозторғай жұмыртқалаған заманның орнауына орасан үлесі бар ардагерлерді құрмет тұту бүгінгі буынның басты парызы.  

Шара мерекелік шерумен басталды. Ардагерлер мінген көлік алға жылжып тағзым алаңына бет алды. Қолдарында қан майданда қаза тапқан батырлар бейнесі. Елін қорғауда жанкештілік танытып ақтық демі шыққанша шайқасқан ерлердің портретін ұрпақтары алаңға алып шықты. Жиналған  жұртшылық шайқаста шейіт болған боздақтардың ескерткіштеріне гүл шоқтарын қойып,бір минут үнсіздікпен еске алып, құран бағыштады.

Мұнан соң ардагерлер арнайы жайылған дастарханнан дәм татты. Майдан кезінде мәзірде болған тағам түрлері әзірленіп, темір құтыларға құйылып берілді. Көз таныс көк ыдысқа  ұзақ қараған қарт майдангерлер өткен күннің естеліктерін еске түсіргендей болды.

Бүгінгі жеңіс мейрамына Тереңөзек тұрғыны Мейірбек Тұрсынбаев та келді. Атасы Еріш Чехословакия мен Уркаина майдандандарына қатысып, ерлік көрсетеді. Жаудың бетін қайтарудағы қайсарлығы ескеріліп, бірнеше медальдармен марапатталады. Орталық алаңдағы салтанатты шараға қатысқан ол атасының айбынды ерлігін мақтан етеді. Сұм соғыстың азапты күнін атасының аузынан естіп өскен ол бүгінгі бейбіт күннің оңайшылықпен келмегенін айтады. 

Мейірбек Тұрсынбаев – ардагер ұрпағы

Тілші: Шара мерекелік бағдарламамен  жалғасты. Кешегі қиян-кескі ұрысты басынан өткерген қарт майдангер мен бүгінгі буынның арасында болған диалогты театрландырылған қойылым арқылы көрсетті.

Салтанатты шарада сөз  алған аудан басшысы ардагерлерді Жеңіс күнімен құттықтап, алғысын білдірді. «Бүгінгі бейбітшілік бесігінде тербелген еліміздің тәуелсіздігі жолында жанқиярлықпен шайқасқан  ардагерлерімізді құрметтеу басты парызымыз », - деді аудан әкімі .

Елдіктің еңселі биігін ел басына күн туғанда көрсете білген майдангерлер қандайда болсын құрметке лайық. Мерекелік шарада майдангер деген мәртебелі ұғымның мағынасын ашып, бүгінгі бейбіт күннің буынына түсіндірілді. Ардагерлердің құрметіне бүлдіршіндер өнер көрсетіп, жиылған жұртты серпілтіп тастады.

Бұл өңірден екі бірдей Кеңес Одағының батыры шыққан. Бірі Жаппасбай Нұсейітов болса, екіншісі Нағи Ілиясов. Жаппасбай Нұрсейтіов сұрапыл жылдары Харьков, Венгрия, Румыния, Киев қалаларын жаудан азат етуге қатысады. 1944 жылы жерлестері қаражат жинап батыр атындағы сүңгуір кеме жасатады. Қазір бұл кеменің қалдығы Ресейдің Мурманск қаласындағы әскери-теңіз музейінде сақтаулы.  Ал Нағи Ілиясов Уркаина майданына қарасты Киев, Донбасс, Ростов, Житомир қалаларын жау қолынан тазарту қатысып, ерен еңбегі еленіп Кеңес Одағының батыры атағы берілген. Жалпы Сырдария ауданнан соғысқа жеті мыңнан астам сарбаз аттанып, олардың төрт мыңға жуығы хабарсыз кетіп, қаза тапса, 92-сі тұтқынға түскен. Бүгінде ауданда Отан соғысына қатысқан үш ардагер тұрады.

Рақымжан Байменов –тыл ардагері

Тілші: Сұрапыл жылдар талай әуелттің шаңырағын ортасына түсіріп, қайғыға белшеден батырды. Бір үйдің балалары бүтіндей аттанып, түгелдей қаза тапқан жағдайлар да болды. Жетімдер көбейіп, жесірлер молайды. Тұтас буынды жоғалттық. Жар астынан көрінген жоқшылық пен жақынын жоқтаған ананың зарлы даусы өткен күннің еншісінде қалды. Бірақ ер есімі ешқашан ұмытылмақ емес. Бүгінгі бейбіт заман ұрпақтарың кешегі қиын-қыстауда елін, жерін, ұрпағының амандығын ойлап, ұрысқа қатысқан абзал азаматтарды қадір тұтып, естен шығармау керек. Алаңға жиналған көпшіліктің де ойы осы арнада тоғысты.

Пірімжан Айдаров – аудан тұрғыны

Айнаш Божантай – аудан тұрғыны

Алтынкүл іскендірова – аудан тұрғыны

Тілші: Бақыт күнін терген күн

Ұлы Жеңіс келген күн

Ел ешқашан ұмытпас

Есімдерін ерлердің! Тағзым алаңында тізілген мына  тақтайшаларда майдан даласына аттанып қаза болған сарбаздардың есімдері жазылған/.

Бұл тақтайшалар майдан даласына аттанып, ерлікпен қаза тапқан ерлердің есімін ұлықтау мақсатында орнатылған. Сұрапыл соғысқа аттанған ең жас майдангер 15 жаста. Бұл маңайға ағаштар отырғызылып, орындықтар қойылған. Мұнда аудан тұрғындары жиналып, бос уақытында тынығып қайтады.

Мұнан соң ардагерлерге мейрамханада арнайы дастархан жайылды. Соғыс және тыл ардагерлеріне құрмет көрсетіліп, сыйлықтар табысталды.

Астан соң абыз ақсақалдар ақжолтай тілегін жеткізіп, ақ батасын берді.

О.Бақытбек

Тақырып бойынша материалдар

Саяси қуғын-сүргін құрбандарын еске алды / Жас кәсіпкерлер үшін жаңа мүмкіндіктер
15:49, 4 маусым 2016
Саяси қуғын-сүргін құрбандарын еске алды / Жас кәсіпкерлер ү...
Толығырақ...

Танымал жаңалықтар

ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
16:33, 16 сәуір 2021
ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
Толығырақ...
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
16:31, 16 сәуір 2021
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
Толығырақ...