ШҰҒЫЛ! АЛТЫН ҚОРДАҒЫ ХАБАРЛАР ҚАЙТА КӨРСЕТІЛЕДІ Толығырақ

Теңіз төскейіндегі Жеңіс тойы

17:01, 10 мамыр 2016

Бір минут үнсіздіктен соң аспанға атылған оқтар. Бұл майдан даласында қаза болған жауынгерлер рухына тағзым етіп, олардың өшпес ерліктерін еске алу сәті. Теңіз төскейіндегі жеңіс тойы боздақтар рухына бас иіп, «Тағзым» алаңына гүл шоқтарын қоюдан басталды.

Тілші: Кеңес Одағының миллиондаған халқымен бірге, қазақстандықтар да сұрапыл соғыстағы жеңіске өзінің үлесін қосты. 1418 күнге созылған соғысқа  Арал ауданынан он бір мыңнан астам адам аттанса олардың жартысынан көбі майдан даласынан оралмады. Осындай қастерлі де қасиетті мерекенің маңызына тоқталған аудан әкімі көпшілікті жеңістің 71 жылдығымен құттықтады.

Абзал Мұхимов – Арал ауданының әкімі

//Кеңес Одағының миллиондаған халқымен бірге, Қазақстандықтар да бұл сұрапыл соғыстағы жеңіске өзінің үлесін қосты. Осы бір 1418 күнге созылған соғысқа 3 миллион 300 мың қазақтың әрбір төртіншісі  қатысты. Оның ішінде, Арал ауданынан аттанған 11045 адамның 41-і өрімдей қыз-келіншектер еді. Солардың  6000-нан астамы туған жердің бір уыс топырағы бұйырмай майдан даласында шейіт болды. Бүгінде жанкешті ерлігімен танылған  жерлестеріміздің есімі жинақ кітапқа енгізілді. Олардың қатарында партизандар Смағұл Жұбатыров, Толыбай Мұразаев, Салы Үсенов есімдерін атап өтпеске болмайды.  Ел тағдыры мен жер тағдыры таразы басына  түскен сын сағатта аралдық азаматтар да туған жердің тағдырына бей-жай қарамайтын ұлтжандылық қасиеттерін танытты.//

Тілші: Соғыс жылдарында «Барлығы да майдан үшін, барлығы да жеңіс үшін» деген ұранмен еңбектеген баладан еңкейген  кәріге дейін тылда еңбек етті. Бұл тұста тыл еңбеккерлерінің тындырымды тірлігі де Кеңес әскерінің күшін одан әрі берік ете түсті. Кешегі кеме жасау зауытының ұжымы елмен қатар соғыс жағдайына бейімделіп, әскери тапсырысқа сай, соғыс техникасына қажетті бөлшектер шығарды.

Аудандағы  еңбекшілер қауымы   майдан даласына 2 миллион 830 мың сом қаржы аударып, астық, жылы киімдер, балық және балық консервісін жөнелтіп, табанды тірліктің орасан зор үлгісін көрсетті.

Жеңіс тойына арналған шара әрі қарай ат бәйгесіне ұласты. Бәйгені ұйымдастырып, өтуіне демеушілік көрсеткен соғыс ардагерлерінің ұрпақтары мен кәсіпкерлер және аудан әкімдігі.

Абзал Мұхимов – Арал ауданының әкімі

Тілші: Жеңіс мерекесінде Арал ауданының алғашқы әкімі, бірінші сайланымдағы Қазақстан Республикасы Парламенті Сенатының депутаты, мәдениет және қоғам қайраткері Биғали Қаюповқа Арал ауданының "Құрметті азаматы" төсбелгісі табысталды.

         Мұнан соң жұрт асыға күткен ат дүбірі естілді. Бәйге жылқының жасына қарай тай, құнан, тоқ, аламан болып бөлінді. Облыстың әр ауданынан сәйгүлігін баптап келген ат иелері мен шабандоздар атшабарға шыққанша асықты.

Тәй бәйгесіне 18 тай қатысты. Бес шақырымға созылған додада ІІІ орын қармақшылық шабандоз Нұржомарт Жәнібековке бұйырды. Тұлпары – «Құндызай». Ал екінші орынды Арал ауданының тұрғыны Сәбитжан Нұрғалиевтің баптаған «Крутойы» жеңіп алды. Мәре сызығын бірінші болып шиелілік Айбек Акбаров тақымдаған торы «Кептер» кесті. Бас жүлдеге тігілген жүз мың теңгені Ұлы Отан соғысының ардагері Қосмағамбет Сапаровтың ұлы табыстады.

Әділхан Сапаров – Қ.Сапаровтың ұлы

Тілші: Құнан бәйгесінде жарыс жолына 19 ат шықты. 12 шақырымға созылған бәйгеде ІІІ орын Қазалы ауданына бұйырса, ІІ орын Аралқұм ауылынан келген күрең қасқа «Құмайдың» еншісінде кетті. Бас бәйгені «Қаратөбел» атты құнанды баптаған Серікбай Рсалиев жеңіп алды.

Тоқ бәйгеде 18 тұлпар бәйгенің көрігін қыздырды. Шашасына шаң жұқпаған шабандоздар ә дегеннен тізгінге ерік берді. 15 шақырымға созылған доданың жартысына таяғанда бабы мен бағы келіспеген аттар жарыс жолынан шығып жатты. Қызылорда қаласынан келген шабандоз Елубай Дияс тақымдағын «Сұңқар» атты сәйгүлік мәре сызығын бірінші болып қиды. Онан соң Қазалы ауданынан келген «Сәукеле», ал үздік үштікті «Астана» атты күрең қорытындылады. Ат иесі қармақшылық – Асқар Нұрмаханов.

Аламан бәйге 22 шақырым қашықтықты қамтыды. Жарыс жолына да 22 тұлпар шықты. Аламанда аты озған шабандозға бас жүлде боталы түйе болды. Сондықтан ат баптағандардың қай-қайсысы да сайгүлігіне сенім артып, әр айналымда шабандозға ақыл-кеңесін айтып жатты. Алғашқы бес айналымда топтасып шапқан тұлпарлардың алтыншы айналымда арасы ажырай бастады. Қалған үш айналымда негізгі тартыс бес шабандоздың арасында өрбіді. Қорытындысында аламанның бас жүлдесіне тігілген боталы түйе Қазалы ауданының тумасы Қонысбай Досжанов баптаған «Бойтұмар» атты сәйгүлікке бұйырды. Шабандозы – Нұрперзент Қонысбаев.

Қонысбай Досжанов – жеңімпаз

Тілші: Айта кетейік Ұлы Отан соғысының ардагері Әбдіғазы Баймырзаевтың атындағы бас жүлдені Баймырзаевтар әулеті тағайындап отыр.

Алтынбай Баймырзаев – Ә.Баймырзаевтың ұлы

Тілші: Аламанда ІІ орынды Қызылордалық «Алтынай» атты сәйгүлік еншілесе, үшінші орын қазалылық «Генералға» бұйырды. Оқ бойы оза шапқан шабандоздардың барлығына Ұлы Отан соғысы ардагерлері ұрпақтарының демеушілігімен тағайындалған ақшалай сыйлықтар табысталды. Осылайша ат дүбіріне бөленген теңіз төскейіндегі жеңіс тойы жоғары дәрежеде атап өтілді.

Тілші: Жеңіс күнінде аудан әкімі бірқатар соғыс ардагерлерінің үйін аралап, мерекемен құттықтады. Бүгінде шежіренің жанды жинағындай болып отырған қазыналы қарттарға құрметін көрсетті. Ең алдымен аудан басшысы Жақсықылыш кентінде тұратын 95 жастағы майдангер Өмірзақ Аманжолов пен Ислам Жайназаровтың шаңырағында болды. Қарт сарбаздар өткеннен естелік айтып, ақ батасын берді.

Мұнан соң аудан әкімі Сексеуіл кенітінің тұрғындары, соғыс ардагерлері Талжан Жанасов, Берден Тұрсынбаев, Махан Жүгінісовтердің хал-жағдайын біліп, қарт жауынгерлерге Елбасы жарлығымен тағайындалған «Жеңістің-71 жылдық» медальін, облыс әкімі Қырымбек Көшербаевтың құттықтау хатын табыстады.

Аралдықтар Жеңіс тойын қызыл әскер қатарында болған соғыс ардагері Борис Шульга атындағы эстафеталық жарыспен түйіндеді. Жүгіруден ұйымдастырылған бұл жарыс қырық жылдан бері үздіксіз жалғасып келеді. Бастысы, батыр рухына тағзым жасаған жерлестері оның есімін ұлықтап, кейінгі ұрпаққа өнеге ету дейді.

Толыбай Әлжанов – аудандық дене шынықтыру және спорт бөлімі басшысының міндетін атқарушы

Тілші: Жалпы жарысқа үш жүзге жуық аудан тұрғыны қатысып отыр. Ал 8-9 сыныптар арасындағы жарысқа 11 команда қатысып, №220 мектеп өрендерінің мерейі үстем болды.

Нұрлыбай Нұрғазиев - №220 мектеп мұғалімі

Тілші: Үш кезеңнен тұратын эстафеталық жарысқа мектеп оқушыларымен бірге аудан тұрғындары да қатысуға ниет білдірген. Эстафетада ересектерден 8 команда сынға түссе, жасөспірімдерден 10 команда жеңімпазды анықтайды.

Асқар Тәжиев

 

Тақырып бойынша материалдар

Саяси қуғын-сүргін құрбандарын еске алды / Жас кәсіпкерлер үшін жаңа мүмкіндіктер
15:49, 4 маусым 2016
Саяси қуғын-сүргін құрбандарын еске алды / Жас кәсіпкерлер ү...
Толығырақ...

Танымал жаңалықтар

ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
16:33, 16 сәуір 2021
ЖАҢА ҚАУЛЫ: СЫРДАРИЯДА ТАЛАП КҮШЕЙТІЛДІ
Толығырақ...
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
16:31, 16 сәуір 2021
АРАЛ АУДАНЫНДА АУҚЫМДЫ ЖОБАЛАР ЖҮЗЕГЕ АСЫРЫЛУДА
Толығырақ...